Google DeepMind bosh direktori Demis Xassabis 60 Minutes dasturiga bergan intervyusida Gemini sunʼiy intellektining rivojlanishi, kelajakdagi versiyalari imkoniyatlari va o‘zini anglay oladigan tizimlarning paydo bo‘lish istiqbollari haqida so‘zlab berdi. Xassabis umumiy sunʼiy intellekt 5-10 yil ichida paydo bo‘lishini taxmin qildi va ong elementlari sunʼiy intellektda qo‘shimcha taʼsir sifatida yuzaga kelishi mumkinligini taʼkidladi.

Intervyu davomida Project Astra ilovasining sinov versiyasiga katta eʼtibor qaratildi. Unda sunʼiy intellekt endi foydalanuvchini shaxsan kutib oladi: “Salom, Skott. Seni yana ko‘rganimdan xursandman”. Vositaning xotirasi takomillashdi - u o‘tgan suhbatlarning asosiy tafsilotlarini moslashtirish uchun saqlaydi va joriy suhbat kontekstini 10 daqiqa davomida saqlab qoladi. Bu funksiyalar tez orada Gemini Live xizmatida ham paydo bo‘lishi kutilmoqda. Shuningdek, videoda Project Astra‘ning aqlli ko‘zoynaklarda qanday ishlashi qisqa ko‘rsatib o‘tildi.

Google DeepMind Gemini sunʼiy intellekt modelini nafaqat maʼlumotlarni tahlil qilishga, balki amaliy harakatlarni bajarish - chiptalarni bron qilish, onlayn xaridlarni amalga oshirish va boshqa operatsiyalarni bajarishga o‘rgatmoqda. Bu ilgari eʼlon qilingan Mariner loyihasiga mos keladi. Sundar Pichai bu yil uni Gemini‘ga joriy etish haqida gapirgan edi.

Xassabis umumiy sunʼiy intellekt 5-10 yil ichida paydo bo‘lishi haqidagi taxminini yana takrorlab o‘tdi. 2030 yilgacha bo‘lgan ehtimoliy ssenariyni tavsiflab, u foydalanuvchilarning kundalik hayotiga tabiiy ravishda singib, atrofdagi dunyoni chuqur va batafsil tushuna oladigan tizimni tasvirladi.

Intervyu davomida Xassabisga Google DeepMind o‘zini anglay oladigan sunʼiy intellektni ishlab chiqayotgani haqida savol berildi. Bunga javoban u, mavjud tizimlarning hech biri qaysidir maʼnoda ongga ega emasligini aytdi. U har kim o‘z qarorini o‘zi qabul qilishi, chat-botlar bilan muloqot qilishi kerakligini taʼkidlab, nazariy jihatdan o‘zini anglaydigan tizimni yaratish mumkinligini qo‘shimcha qildi.

Google DeepMind rahbari bunday sunʼiy intellektni maqsadli ishlab chiqish haqidagi savolga javob berar ekan, bu asosiy maqsad emasligini, ammo yon taʼsir sifatida paydo bo‘lishi mumkinligini taʼkidladi. Uning so‘zlariga ko‘ra, tizimlar o‘z-o‘zini anglash elementlarini o‘z-o‘zidan rivojlantirishi mumkin, ayniqsa “o‘zini va boshqalarni” tushunishga o‘rgatishda - bu haqiqiy ongning boshlanishi bo‘lishi mumkin.

Xassabis ongni tan olishning ikki mezonini ajratib ko‘rsatdi: xulq-atvorning inson bilan o‘xshashligi va substratning biologik umumiyligi. “Mashinalar kremniyda, biz esa uglerod asosida ishlaymiz. Hatto bir xil xatti-harakatlar ham ularning ong hissi biznikiga o‘xshash bo‘lishini kafolatlamaydi”, deya izoh berdi u.