AgiBot startapi yangi GO-1 sunʼiy intellekt modelidan foydalanib, oldindan o‘rgatilmasada murakkab harakatlarni bajara oladigan Lingxi X2 gumanoid robotini taqdim etdi, deyiladi RepublicAi‘da eʼlon qilingan xabarda.

Ishlab chiqaruvchilar tomonidan qurilmaning imkoniyatlari aks ettirilgan videoda bo‘yi 1,3 metr va og‘irligi 33,8 kilogramm bo‘lgan ixcham Lingxi X2 gumanoid roboti turli xil harakatlarda g‘oyat chaqqonlikni namoyish etgan. AgiBot maʼlumotiga ko‘ra, robot yurish, yugurish, burilish, raqsga tushish, samokat va hatto velosiped uchish qobiliyatiga ega.

Lingxi X2 “nol tanlovli” umumlashtirish texnologiyasidan foydalanadi, bu robotga hech qanday oldindan tayyorgarliksiz asosiy vazifalarda obyektlarni boshqarish imkonini beradi. Bunday o‘qitish ishi uchun yaqinda ishlab chiqilgan Genie Operator-1 (GO-1) sunʼiy intellekt modeli masʼuldir.

GO-1 modeli - robotlarning o‘rganishi va vazifalarni bajarishini takomillashtirish uchun maxsus yaratilgan sunʼiy intellektdir. Tizim haqiqiy vazifalarni bajarish va inson harakatlarini talqin qilishni yaxshilash uchun tasvirlar va video maʼlumotlarni tahlil qilishdan foydalanadi. Kompaniya vakillari aytishicha, samaradorlik sinovlarida tizim o‘xshash modellardan sezilarli ustunlikni ko‘rsatgan va beshta turli vazifada muvaffaqiyat ko‘rsatkichlarini 46 foizdan 78 foizgacha oshirgan.

Lingxi X2 shuningdek, buyruqlarga millisekund ichida javob beradigan ko‘p qirrali o‘zaro taʼsir modeliga ega. Robot yuz ifodalari va ovoz ohanglarini tahlil qila oladi, insonning hissiy holatlarini aniq belgilaydi va tegishli munosabatni bildiradi.

Realistik dizayn robotga insonning nafas olishi, his-tuyg‘ulari va harakatlarini taqlid qilish imkonini beradi, bu esa u bilan muloqotni yana-da tabiiyroq qiladi. AgiBot o‘z robotini uy bekasi, farrosh va qorovul vazifalarini bajara oladigan ko‘p funksiyali yordamchi sifatida taqdim etmoqda.