“O‘g‘rini qaroqchi uryapti”: dasturlarni “tekinga” faollashtirish virus yuqtirishga olib kelishi mumkin.

“Kasperskiy laboratoriyasi” mutaxassislari nafaqat foydalanuvchi maʼlumotlarini o‘g‘irlaydigan, balki zararlangan kompyuterlarda kriptovalyuta mayning qiladigan yangi troyanni aniqladi. Kompaniya uni SteelFox deb nomladi. 2024 yilning avgust-oktyabr oylarida ushbu dastur yordamida turli mamlakatlardagi xakerlar tomonidan 11 mingdan ortiq hujum amalga oshirilgani qayd etilgan. Bunday hujumlarning eng ko‘pi (20%) Braziliyaga, 8 foizdan Xitoy va Rossiyaga to‘g‘ri kelmoqda, deyiladi “Vedomosti” nashri xabarida.

“Kasperskiy laboratoriyasi” vakilining aytishicha, SteelFox ommabop dasturlarni bepul faollashtirish uchun ishlatiladigan norasmiy dasturiy taʼminot ko‘rinishida tarqalmoqda. Rossiyadagi Kaspersky GReAT rahbari Dmitriy Galovga ko‘ra: “Foydalanuvchi qonuniy dastur uchun litsenziyani faollashtirishga imkon beradigan dasturni yuklab olayotgandek o‘ylaydi, ammo aslida o‘z qurilmasiga SteelFox‘ni o‘rnatadi”.

Xususan, gap AutoCAD (avtomatlashtirilgan loyihalash va chizma chizish dasturi), Foxit PDF Editor (pdf-hujjatlarni tahrirlash uchun dastur) va JetBrains (mashhur dasturlash tillarida ishlab chiqish vositalari) mahsulotlari uchun soxta aktivatorlar haqida bormoqda. Kompaniya vakilining tushuntirishicha, yangi troyan sohaga oid forumlar, torrent-trekerlar va GitHub‘da tarqalmoqda.