Windows 11 ommalashmoqda, lekin hali ham XP ishlatayotganlar bor …
Windows 10 qo‘llab-quvvatlash muddati tugashi arafasida 11-talqinning mashhurlik darajasi sekin bo‘lsa-da, o‘sib bormoqda. Bugun dunyodagi barcha Windows kompyuterlarining 35,5 foizi ushbu tizim ostida ishlaydi. Shunga qaramay, Windows 10 Microsoft operatsion tizimlari reytingida katta farq bilan yetakchilikni saqlab qolmoqda. Kompaniya hamma kompyuterlar ham Windows 11‘ning minimal tizim talablariga javob bermasligini anglaydi, shuning uchun 10-versiyani qo‘llab-quvvatlashni butkul to‘xtatmoqchi emas – yillik 30 dollar evaziga yangilanishlardan bahramand bo‘lish mumkin.
Statcounter‘ning so‘nggi maʼlumotlariga ko‘ra, Windows 11 tobora ommalashib bormoqda va uning tarqalish surʼatlari sezilarli darajada tezlashmoqda. 2024 yil oktyabr oyida Microsoft operatsion tizimining so‘nggi versiyasi o‘zining bozor ulushini 2,13 foizga oshirdi va rekord darajadagi 35,55 foizga yetdi. Bir yil oldin Windows 11‘ning ulushi bir necha oylar davomida 26,17 foiz atrofida tebranib turgan, baʼzan bu qiymatdan ham pastroqqa tushgan davrlari bo‘lgan.
Yangi Windows‘ning ommaviyligi oshib borishi bilan 10-talqin bozordagi ulushini mutanosib ravishda yo‘qotib bormoqda. U 2019 yil sentyabr oyidan beri birinchi marta 60 foizdan pastga tushishga yaqin. Bugungi kunda, Statcounter maʼlumotlariga ko‘ra, barcha Windows foydalanuvchilarining taxminan 60,95 foizi Windows 10‘dan foydalanadi.
Statcounter versiyasida Microsoft operatsion tizimlarining mashhurlik reytingi quyidagicha:
Windows 10 - 60,95% (-1,8 foiz)
Windows 11 - 35,55% (+2,13 foiz)
Windows 7 - 2,62% (-0,22 foiz)
Windows 8.1 - 0,31% (-0,05 foiz)
Windows XP - 0,28% (-0,06 foiz)
Operatsion tizimlarning umumiy reytingiga kelsak, Windows unda barqaror ikkinchi o‘rinni egallab kelmoqda:
Android - 44,62% (-0,54 foiz)
Windows - 26,83% (+0,13 foiz)
iOS - 18,49% (+0,37 foiz)
macOS - 5,67% (+0,06 foiz)
Boshqalar - 1,77% (+0,07 foiz)
Shuni taʼkidlash kerakki, Statcounter‘ning tahliliy usullari 100 foizlik aniqlikni kafolatlamaydi. Reyting uchun maʼlumotlar qanday to‘planishi kompaniya saytida batafsil yoritilgan.
