Apple barcha xohlovchilarga Apple Intelligence so‘rovlari bilan bog‘liq vazifalar uchun mo‘ljallangan Private Cloud Compute (PCC) tizimining xavfsizligini “sinov”dan o‘tkazishni taklif qilmoqda. Aniqlangan zaifliklar uchun kompaniya 1 million dollargacha mukofot to‘lashga tayyorligini bildirdi.

Apple bir necha bor Apple Intelligence paketidagi sunʼiy intellektning ko‘plab funksiyalari lokal, yaʼni qurilmani “tark etmagan” holda ishlashini taʼkidlagan. Biroq murakkab so‘rovlar Apple Silicon chiplari asosida qurilgan va yangi operatsion tizim boshqaruvidagi PCC serverlariga yo‘naltiriladi. Ko‘pchilik SI ilovalar ishlab chiquvchilari bulutli infratuzilmada so‘rovlarni qayta ishlashni taklif qilsalar-da, foydalanuvchilarga bu operatsiyalarning qanchalik xavfsiz ekanligini baholash imkonini bermaydilar. Foydalanuvchilar maxfiyligini ustuvor vazifa deb bilgan Apple esa mustaqil ekspertlarni o‘z tizimlarining himoyalanganlik darajasini tekshirishga chaqirdi.

Buning uchun kompaniya quyidagilarni taqdim etadi:

• PCC ishlashining texnik tafsilotlari keltirilgan xavfsizlik bo‘yicha qo‘llanma;

• shaxsiy kompyuterda PCC tahlilini o‘tkazish imkonini beruvchi “virtual tadqiqot muhiti” (Virtual Research Environment) – buning uchun 16 Gbayt xotirali Apple Silicon chipiga ega Mac va eng so‘nggi macOS Sequoia 15.1 Developer Preview kerak bo‘ladi;

• GitHub‘da eʼlon qilingan “xavfsizlik va maxfiylik talablarini taʼminlashga yordam beradigan PCC‘ning ayrim muhim komponentlari”ning manba kodi.

Zaifliklarni qidirish dasturi (bug bounty) doirasida Apple o‘z mahsulotlarida aniqlangan xatolar uchun 50 mingdan 1 million AQSH dollarigacha mukofot vaʼda qilmoqda. Bu o‘zini xavfsizlik sohasida mutaxassisman deganlar uchun ham jiddiy chaqiriq.

Eslatib o‘tamiz, kelgusi haftada iOS 18.1 chiqishi kutilmoqda, u bilan Apple Intelligence‘ning dastlabki funksiyalari taqdim etiladi.