Davlat boshqaruvida raqamli transformatsiya jarayonlari izchil amalga oshirilmoqda. Shu yo‘nalishda muhim qadam sifatida ijro.gov.uz tizimi Dono.ai sun’iy intellekt platformasi bilan integratsiya qilindi.

Mazkur integratsiya qonunchilik hujjatlarining ijrosini nazorat qilishda ilg‘or texnologiyalarni joriy etish orqali samaradorlikni oshirish, jarayonlarni avtomatlashtirish hamda shaffoflikni ta’minlashga xizmat qiladi.

Yangi tizimning asosiy imkoniyatlari

Sun’iy intellekt asosida ishlovchi yangi yechim quyidagi funksiyalarni amalga oshiradi:

🔹 Avtomatik tahlil — qonunchilik hujjatlaridan kelib chiqadigan topshiriqlarni tahlil qilib, ularni ijro jarayonlari bilan bog‘laydi.
🔹 Ijro baholash — vazirlik va idoralar tomonidan taqdim etilgan javoblarni ijro darajasi va sifat ko‘rsatkichlariga ko‘ra avtomatik baholaydi.
🔹 Tavsiyalar shakllantirish — nazorat organlariga topshiriqlarni nazoratdan chiqarish yoki qayta ishlash bo‘yicha intellektual tavsiyalar beradi.
🔹 Ijrochilarga yordam — ijrochilarga topshiriqlarni sifatli va o‘z vaqtida bajarish uchun sun’iy intellekt asosida tahliliy va tavsiyaviy ko‘mak ko‘rsatadi.
🔹 Monitoring va hisobotlar — real vaqt rejimida nazorat jarayonlarini kuzatish, analitik hisobotlarni shakllantirish va qaror qabul qilishni tezlashtiradi.

Natijada qonunchilik hujjatlarining ijrosi ustidan nazorat:
Shaffof — barcha jarayonlar ochiq va kuzatuvchan shaklda amalga oshiriladi;
Tezkor — sun’iy intellekt yordamida tahlil va baholash jarayonlari avtomatlashtiriladi;
Samarali — inson omili kamaytirilib, qaror qabul qilish sifatini oshiradi.

Davlat boshqaruvida yangi bosqich

Mazkur loyiha davlat boshqaruvida sun’iy intellekt texnologiyalarini amaliy joriy etish yo‘lidagi navbatdagi muhim bosqich bo‘lib, raqamli davlat tizimini yanada takomillashtirishga xizmat qiladi. Bu tashabbus orqali ijro.gov.uz tizimi nafaqat qonunchilik hujjatlarining ijrosini samarali nazorat qiladi, balki davlat boshqaruvida ochiqlik, shaffoflik va tezkorlik tamoyillarini mustahkamlashda muhim o‘rin tutadi.

Ma’lumot uchun:
Dono.ai — sun’iy intellekt asosidagi tahlil va avtomatlashtirish platformasi bo‘lib, davlat boshqaruvi, iqtisodiyot, ta’lim va boshqa sohalarda qaror qabul qilish jarayonlarini raqamlashtirish va optimallashtirishga xizmat qiladi.