Kelajakdagi mahsulotlar hech qachon iPhone biznesi kabi daromadli bo‘lmasligi mumkin – Apple kompaniyasi investorlarni ogohlantirmoqda. Kompaniya sunʼiy intellekt va virtual reallik qurilmalari kabi yangi sinovdan o‘tmagan bozorlarga kirib bormoqda. Bu yo‘nalish daromadlarini bugun bashorat qilish qiyin.

Apple o‘zining so‘nggi moliyaviy hisobotiga sotuvlar va daromadning o‘sishiga taʼsir qilishi mumkin bo‘lgan omillar haqida yangi ogohlantirishni qo‘shdi: “Yangi mahsulotlar, xizmatlar va texnologiyalar mavjud takliflarni almashtirishi yoki siqib chiqarishi hamda daromad va foydaning pasayishiga olib kelishi mumkin, bu esa biznes, faoliyat natijalari va moliyaviy holatga sezilarli darajada salbiy taʼsir ko‘rsatishi mumkin”.

Yillik hisobotlarda kompaniya anʼanaviy ravishda investorlarni beqarorlik va foydaning pasayishiga olib kelishi mumkin bo‘lgan raqobat, valyuta kurslarining o‘zgarishi va taʼminot zanjirlaridagi muammolar kabi omillar haqida ogohlantiradi. Bu yil Apple, shuningdek, “geosiyosiy beqarorlik”ning ehtimoliy taʼsiri haqida ogohlantirish qo‘shdi – bu band bir necha yil davomida xavf omillarida yo‘q edi – va sunʼiy intellekt bilan bog‘liq xavfsizlik xatarlari haqida maʼlumot berdi. Bu bayonot Apple‘ning Vision Pro aralash reallik qurilmasiga, shuningdek, Apple Intelligence, Siri va ChatGPT bilan integratsiyaga katta sarmoya kiritishi fonida paydo bo‘ldi.

Deepwater Asset Management kompaniyasidan Jin Munster (Gene Munster)ning taʼkidlashicha, Apple yangi mahsulot toifalarini o‘zlashtirayotganida noaniqlik bosqichida turibdi. Masalan, so‘nggi yillardagi Apple‘ning yangi qurilmalaridan biri bo‘lgan Vision Pro 3500 AQSH dollar turadi va cheklangan miqdorda sotilmoqda. Munster, shuningdek, Apple qanday qilib sunʼiy intellektdan AI funksiyalaridan foydalanish uchun haq olmasdan daromad olishni rejalashtirayotgani haqida savol berdi.

Taʼkidlash joizki, Apple, shuningdek, App Store va xizmat ko‘rsatish biznesining boshqa yo‘nalishlari bo‘yicha tartibga soluvchi organlar tomonidan bosimga duch kelmoqda. Xususan, Google‘ning AQSH monopoliyaga qarshi qonunchiligidan “mag‘lubiyati” Apple‘ni hozirda qidiruv gigantidan hamkor sifatida olayotgan milliardlab dollar litsenziya to‘lovlaridan mahrum qilish bilan tahdid solmoqda.

Yuqoridagi maʼlumotlarga qaramay, Apple‘ning yalpi foydasi iPhone ishga tushirilgan 2007 yildagi 33 foizdan 2021 yilga kelib 40 foizdan oshdi. Bu tobora ko‘proq mijozlar, keskin raqobat muhitiga qaramay, iPhone‘ning qimmat modellarini tanlayotgani tufayli yuz bermoqda.