Meta bolalarda ongli ravishda qaramlik hosil qilish ayblovlaridan qochib qutula olmadi – sud biribir o‘tkaziladigan bo‘ldi.

Meta kompaniyasi Florida shtati va AQSHning 33 nafar bosh prokurorining jamoaviy daʼvolariga javob berishiga to‘g‘ri keladi. Kompaniya Facebook va Instagram‘da o‘smirlarda qaramlikni keltirib chiqaradigan xususiyatlarni ataylab ishlab chiqqanlikda ayblanmoqda. Tabiiy, Meta ayblovlarni rad etishga harakat qildi, ammo muvaffaqiyatsiz – Kaliforniya federal sudi kompaniya iltimosini rad etdi.

O‘tgan yili taqdim etilgan daʼvo arizalarida aytilishicha Meta voyaga yetmaganlarning “ruhiy va jismoniy salomatligiga zarar yetkazishiga” olib keladigan funksiyalarni joriy etishda ayblangan. Oklendlik AQSH okrug sudyasi Ivonne Gonzales Rojers (Yvonne Gonzalez Rogers) Meta kompaniyasining daʼvo arizasini rad etish haqidagi iltimosnomasini qondirmadi. Endi ayblovchilar qo‘shimcha dalillar to‘plashni davom ettirishi, keyin esa sud muhokamasiga o‘tishlari mumkin.

Sudya Rojers taʼkidlashicha, onlayn platformalarga tashqi kontent uchun fuqarolik javobgarligidan immunitet beruvchi qonunning 230-bandiga qaramay, daʼvogarlar ishni ko‘rib chiqishni davom ettirish uchun yetarli maʼlumot taqdim etishgan.

Ayblov tomoni Meta federal va shtat qonunlarini, jumladan, Internetda bolalar maxfiyligini himoya qilish to‘g‘risidagi qonun (COPPA), Kaliforniya soxta reklama to‘g‘risidagi qonuni (FAL) va Kaliforniya adolatsiz raqobat to‘g‘risidagi qonunini (UCL) buzgan deb hisoblaydi. Shtatlar Meta kompaniyasining nohalol ish amaliyotiga qarshi choralar ko‘rishga va unga nisbatan fuqarolik-huquqiy sanksiyalar qo‘llashga intilmoqda.

“Ushbu sud jarayoni ijtimoiy tarmoq egalari qanday javobgarlikka tortilishi va bu kompaniyalar o‘nlab yillar davomida farzandlarimizga qanday munosabatda bo‘lishi mumkinligini aniqlashga yordam beradi”, - dedi Bosh prokurorlar jamoasiga rahbarlik qilgan bosh prokuror Bonta. “Meta yaxshiroq harakat qilishi mumkin va shunday qilishi kerak. Bolalarimiz o‘z bolaligini qaytarib olishga haqli”.

Meta vakilining aytishicha, kompaniya ayblovlarga qo‘shilmaydi, chunki u o‘smirlarga ekrandagi vaqtini boshqarish va xavfsizlikda qolishga yordam beradigan vositalar va texnologiyalar, jumladan, Instagram‘dagi yangi “O‘smirlar hisoblari (akkauntlari)”ni joriy qilgan.