OpenAI мультимодаль GPT-4o алгоритмининг вориси бўлган катта тил модели GPT-4.1’ни расман эълон қилди. Компания маълумотларига кўра, янги сунъий интеллект модели каттароқ контекст ойнасига эга бўлиб, умуман олганда GPT-4o’дан “деярли барча жиҳатдан” устунлик қилади. Бунга қўшимча равишда, алгоритмнинг дастурий код ёзиш ва кўрсатмаларга амал қилиш имкониятлари ҳам такомиллаштирилган.

GPT-4.1 аллақачон кичикроқ нейрон тармоқнинг иккита версияси билан бирга дастурчилар учун фойдаланишга берилди. Булар GPT-4.1 Mini ва GPT-4.1 Nano алгоритмлари бўлиб, OpenAI таъкидлашича, уларнинг сўнггиси “энг кичик, энг тез ва энг арзон” сунъий интеллект моделидир. GPT-4.1’нинг уччала версияси ҳам кўп модалли бўлиб, улар нафақат матн билан, балки расм ёки видеолар каби бошқа маълумотлар билан ҳам ишлаш имкониятига эга. Контекст ойнасининг ҳажми 1 миллион токенгача кенгайтирилди, бу GPT-4o’даги 128 минг токен билан солиштирганда сезиларли даражада кўпдир.

Таъкидланишича, GPT-4.1 фойдаланувчи билан мулоқот давомида контекст ойнаси ичидаги маълумотларни юқори сифатда қайта ишлаш қобилиятига эга. “Биз уни GPT-4o’га қараганда анча ишончлироқ тарзда тегишли матнни аниқлаш ва контекстнинг узун ҳамда қисқа қисмларидаги чалғитувчи элементларни эътиборсиз қолдиришга ўргатдик”, дейилади OpenAI хабарида. GPT-4.1 шунингдек, GPT-4o’дан 26 фоиз арзонроқ бўлиб, бу Хитойнинг DeepSeek компанияси томонидан тақдим этилган ўта самарали сунъий интеллект модели дебютидан сўнг айниқса муҳим кўрсаткичга айланди.

GPT-4.1’нинг ишга туширилиши OpenAI’нинг икки йил аввалги GPT-4 сунъий интеллект моделидан воз кечишга тайёргарлик кўриши фонида содир бўлмоқда. Расмий маълумотларга кўра, 30 апрелдан сўнг GPT-4o модели GPT-4’нинг “табиий вориси”га айланади. OpenAI, шунингдек, 14 июлда API орқали GPT-4.5’нинг дастлабки версиясига киришни тўхтатади, чунки “GPT-4.1 кўплаб асосий функциялар бўйича анча кам харажат ва ресурслар билан яхшиланган ёки шунга ўхшаш ишлашни таклиф этади”.