Unicon-soft kompaniyasi hamda Sun’iy intellekt alyansi o‘rtasida raqamli transformatsiya va sun’iy intellekt texnologiyalarini rivojlantirish maqsadida uchrashuv bo‘lib o‘tdi. Uchrashuv davomida 2026-yilga mo‘ljallangan ustuvor hamkorlik yo‘nalishlari muhokama qilindi. Xususan, tomonlar quyidagi yo‘nalishlarda yaqin hamkorlikni yo‘lga qo‘yishga kelishib oldilar:

• Hakatonlar va innovatsion tanlovlar — yosh mutaxassislar va startaplar uchun ochiq platformalar yaratish, iqtidorlarni aniqlash va ularning g‘oyalarini amaliy loyihalarga aylantirish;
• R&D (Research & Development) yo‘nalishidagi qo‘shma loyihalar — sun’iy intellekt asosidagi yechimlarni ishlab chiqish, ilmiy tadqiqotlarni real sektor ehtiyojlari bilan uyg‘unlashtirish;
• Amaliy ishlanmalarni joriy etish — davlat va xususiy sektor uchun AI yechimlarini ishlab chiqish, pilot loyihalarni ishga tushirish hamda raqamli xizmatlar sifatini oshirish;
• Kadrlar salohiyatini rivojlantirish — treninglar, seminarlar va texnik workshoplar orqali mutaxassislar tayyorlash.

Mazkur hamkorlik O‘zbekistonda sun’iy intellekt ekotizimini mustahkamlash, texnologik eksportni oshirish va raqamli iqtisodiyot rivojiga hissa qo‘shishga xizmat qiladi.

Eslati o‘tamiz, 2025-yilning oktyabrida o‘tkazilgan sun’iy intellekt texnologiyalarini rivojlantirish yuzasidan videoselektor yig‘ilishida Prezident Shavkat Mirziyoyev 2030-yilgacha sun’iy intellekt sohasida dunyoning TOP-50 davlatlari qatoriga kirish maqsadini ochiqlagan, buning uchun esa ilg‘or mamlakatlar tajribasiga tayanilgan holda Sun’iy intellekt alyansi tashkil etilishini ma’lum qilgandi.