OpenAI tomonidan yaratilgan sunʼiy intellektli chatbot ChatGPT dunyoda o‘z sohasining eng mashhur xizmati hisoblanadi. Ammo SimilarWeb va Sensor Tower tahlil kompaniyalarining maʼlumotlariga ko‘ra, raqobatdosh platformalar ham o‘z auditoriyasini jadal surʼatda kengaytirmoqda.

Veb-saytlar, jumladan chatbotlarning veb-versiyalari trafigini baholashga ixtisoslashgan SimilarWeb kompaniyasining taʼkidlashicha, mart oyi yakuniga ko‘ra Google Gemini xizmati fevral oyiga nisbatan auditoriyasini 7,4 foizga oshirib, kunlik tashrif buyuruvchilar soni 10,9 millionga yetgan, deyiladi RepublicAi xabarida. Microsoft Copilot bir oy ichida auditoriyasini 2,1 milliondan 2,4 millionga ko‘paytirgan. Anthropic Claude mart oyida kuniga 3,3 million tashrif buyuruvchiga erishgan. Xitoyning DeepSeek chatboti va xAI Grok kunlik foydalanuvchilar soni 16,5 millionga yetgan. ChatGPT esa mart oyi oxirida kuniga 500 million tashrif buyuruvchiga ega bo‘lgan.

OpenAI platformasi katta farq bilan yetakchilikni saqlab qolmoqda, biroq ikkinchi o‘rin uchun jiddiy kurash ketmoqda. Mart oyi yakunida ikkinchi o‘rinni egallagan DeepSeek fevral oyidagi auditoriyasining 25 foizini yo‘qotgan. xAI Grok esa o‘tgan oyga nisbatan deyarli 800 foiz o‘sishni qayd etib, SimilarWeb maʼlumotlariga ko‘ra, reytingdagi eng katta ijobiy dinamikani ko‘rsatgan.

Chatbotlarning mobil ilovalariga tashriflar dinamikasi sunʼiy intellektning yangi modellari chiqarilishi bilan bog‘liq. Sensor Tower statistikasiga ko‘ra, 24 fevralda Anthropic Claude 3.7 Sonnet modelini chiqargandan so‘ng boshlangan hafta davomida Claude ilovasining auditoriyasi 21 foizga o‘sgan. Ikki hafta oldin, Google Gemini 2.0 Flash taqdimotidan keyin esa Gemini ilovasi auditoriyasi bir hafta ichida 42 foizga ko‘paygan. Yangilangan modellardan tashqari, foydalanuvchilarni xizmatlarning Gemini‘dagi dastur kodini ishga tushirish imkonini beruvchi Canvas funksiyasi yoki Anthropic tomonidan muntazam ravishda qo‘shib boriladigan Claude‘ning yangi funksiyalari kabi yangi imkoniyatlari ham qiziqtirmoqda.

Biroq bu yerda ham OpenAi uchun xavotirlanishga sabab yo‘q. Mart oyi holatiga ko‘ra, ChatGPT mobil ilovasining faol foydalanuvchilari soni Gemini va Claude auditoriyasini birgalikda hisoblaganda ham o‘n barobar ko‘p bo‘lgan.