Gemini Live ovozli yordamchisi ko‘rish qobiliyatiga ega bo‘lmoqda.

Shu oyning boshida MWC ko‘rgazmasida eʼlon qilinganidek, Google Gemini Live ovozli yordamchisi foydalanuvchilari uchun yangi imkoniyatlarni joriy etishga kirishdi. Ushbu bosqichda gap Project Astra algoritmi orqali qurilma ekrani va kamerasini birgalikda ishlatish imkoniyatlari haqida bormoqda.

Manbalarga ko‘ra, Android qurilmalarining ayrim foydalanuvchilari uchun yuqorida aytib o‘tilgan imkoniyatlar o‘tgan hafta oxirida paydo bo‘ldi. Foydalanuvchilardan biri yangilangan Gemini Live interfeysini faollashtirganida, “Ekran haqida so‘rash” tugmasi yonida joylashgan yangi “Ekranni Live bilan ulashish” tugmasini payqagan. Taʼkidlanishicha, hozircha faqat ekrandagi barcha maʼlumotni ulashish mumkin, alohida ilovalarni tanlash imkoniyati yo‘q.

Shu bilan birga, foydalanuvchilar qurilma kamerasini haqiqatan ham interaktiv qiladigan va uni atrof-muhit bilan o‘zaro aloqa qilish uchun ishlatishga imkon beradigan Project Astra algoritmiga kirish imkoniyatiga ega bo‘ldilar. Bu vosita bilan ishlashni boshlash uchun Gemini Live interfeysini ishga tushirish va kamerani faollashtirish kerak. Ekranning pastki o‘ng burchagida old kameraga o‘tish tugmasi mavjud.