Texnogigantlar sunʼiy intellektga yiliga 500 milliard dollardan ortiq mablag‘ sarflashni boshlaydi

Bloomberg Intelligence tahlilchilarining fikricha, DeepSeek‘ning global AT sanoatiga taʼsiri bozor ishtirokchilarining hisoblash infratuzilmasiga xarajatlarini oshirishga intilishida namoyon bo‘ldi. 2032 yilga kelib, texnologik gigantlar birgalikda o‘z hisoblash infratuzilmalarini rivojlantirish uchun yiliga 525 milliard dollardan ortiq mablag‘ sarflaydilar.

Bloomberg Intelligence vakillarining maʼlum qilishicha, joriy yilda Microsoft, Amazon va Meta Platforms kabi gipermasshtabli kompaniyalar bu maqsadlar uchun 371 milliard dollar sarflashlari kutilmoqda. Bu o‘tgan yilga nisbatan 44 foizga ko‘pdir. Tahlilchilarning bashoratiga ko‘ra, 2032 yilga borib bu miqdor 525 milliard dollargacha yetadi. Mutaxassislarning taʼkidlashicha, DeepSeek til modellari bozorda paydo bo‘lganidan so‘ng, bu xarajatlar yana-da tezroq o‘sadi. Bundan tashqari, investitsiyalar ustuvorligi mulohaza yurituvchi sunʼiy intellekt tomon o‘zgaradi. Bunga OpenAI kompaniyasining faolligi ham turtki bo‘lmoqda.

Maʼlum darajada, bunday bashorat sunʼiy intellekt tizimlari uchun komponentlarni yetkazib beruvchi kompaniyalar kapitaliga sarmoyadorlarning xavotirlarini tinchlantirishga qaratilgan. Ularning baʼzilari DeepSeek‘ning kamroq resurs talab qiladigan samarali til modellarini taklif qilish qobiliyati maxsus uskunalarni sotib olish xarajatlarini kamaytirishini taxmin qilishgan edi.

Shu bilan birga, mulohaza yurituvchi sunʼiy intellektning tarqalishi moliyaviy oqimlarning qayta taqsimlanishiga olib keladi. Ushbu avlod modellari ishlab chiquvchilarga dasturiy taʼminotni monetizatsiya qilish uchun ko‘proq imkoniyatlar beradi. Xarajatlar nuqtai nazaridan ularning asosiy qismi ham o‘qitish davridan foydalanish davriga o‘tkaziladi. Shunga ko‘ra, modellarni o‘qitish xarajatlari DeepSeek yechimlari paydo bo‘lishidan oldingiga qaraganda sekinroq o‘sadi. Biroq bu tendensiya mulohaza yurituvchi sunʼiy intellektga xarajatlarning oshishi bilan qoplanadi.

Bloomberg Intelligence tahlilchilariga ko‘ra, joriy yilda ishlab chiquvchilarning modellarni o‘qitish xarajatlari ularning umumiy xarajatlarining 40 foizdan ortig‘ini tashkil etadi, ammo 2032 yilga kelib ularning ulushi 14 foizgacha pasayadi. Shu bilan birga, mulohaza yurituvchi sunʼiy intellekt o‘sha vaqtga kelib barcha investitsiyalarning yarmini o‘ziga jalb qiladi. O‘z chiplarini ishlab chiqaradigan Google korporatsiyasi yangi sharoitlarda ishlashga tezda moslashishi mumkin, Nvidia yechimlariga bog‘liq bo‘lgan Microsoft va Meta kabi kompaniyalar uchun esa buni amalga oshirish ancha mushkul bo‘ladi.