Neuralink implantati natijalar ko‘rsatishni boshladi – yaqinda boshiga Neuralink implantati o‘rnatilgan birinchi bemor – qo‘l va oyoqlarini harakatlantira olmaydigan Noland Abro X ijtimoiy tarmog‘ida o‘z ahvoli haqida post qoldirib, qurilmaning hech qanday nojo‘ya taʼsiri – na jismoniy, na ruhiy taʼsiri kuzatilmaganini maʼlum qildi. Zondlar uning miyasida taxminan bir yildan beri turibdi, bu esa ushbu neyron platformasini dastlabki jiddiy baholash uchun yetarli hisoblanadi. Amaliyot shuni ko‘rsatdiki, Neuralink oyoq-qo‘llari falaj bo‘lgan odamlarga kompyuterda mustaqil ishlash va ijtimoiy tarmoqlarda muloqot qilishni boshlash imkonini bermoqda.

Neuralink‘ning asosiy muammosi shundaki, miya to‘qimalariga kiritilgan ingichka igna-zondlar bosh suyagi ichidagi asab to‘qimalarining harakatchanligi tufayli asta-sekin siljishi mumkin. Zondlarning bir qismi operatsiyadan bir necha soat o‘tgach o‘z joyini tark etishi yoki sezilarli darajada siljishi mumkin. Bu neyroimplantatni doimiy ravishda kalibrlashni talab qiladi. Birinchi bemorning 85% zondlari o‘rnatish zonasidan chiqib ketgan, shuning uchun u muqarrar kalibrlash jarayonini yaxshilash va soddalashtirish uchun Neuralink jamoasi bilan muntazam ravishda ishlashni davom ettirmoqda.

Shunday bo‘lsa-da, implantning bir yillik kundalik qo‘llanilishi uning yuqori darajadagi ishonchliligi va xavfsizligini ko‘rsatdi. Uning yordamida bemor og‘zi bilan boshqaradigan joystikdan voz kechib, kursorni faqat fikr kuchi bilan harakatlantira boshladi, poygalar va strategiyalarni, shu jumladan mashhur “Sivilizatsiya” o‘yinini o‘zlashtirdi. Uning aytishicha, u hatto aravachasini xayolan boshqara olishi mumkin va Neuralink jamoasidan kundalik ishlar uchun “robotqo‘l”ni doimiy ravishda so‘ramoqda. Kelgusi rejalarga ushbu amaliyot ham kiritilgan va Neuralink takomillashtirishga doimiy ochiqligini hamda ehtiyojmand shaxslar uchun implantat hayotning odatiy qismiga aylanishiga ishonmoqda.